Tippi Hedren (ing. Tippi Hedren, 19 yanvar 1930, Minnesota, ABŞ) — ABŞ aktrisası, daha çox "Quşlar" və "Marni" filmlərindəki rolları ilə tanınır. Aktrisa Melani

Tippi Hedren (Natali Key Hedren) 19 yanvar 1930-cu ildə Minnesotanın Nyu-Ulm şəhərində anadan olmuşdur. Onun ata tərəfdən babası İsveçdən ABŞ-yə immiqrant kimi gəlmişdir. Anasının kökləri isə Almaniya və Norveçə gedib çıxır. O, öz sonrakı adı olacaq "Tippi"ni isə hələ uşaq ikən atasından almışdı. Gələcək aktrisanın atası elə hesab edirdi ki, Natali adı uşağa yox böyüklərə yaraşır.

Yeniyetmə yaşlarında Tippi geyim mağazalarında moda nümayişlərində iştirak etmişdir. Tippi orta məktəbdə oxuyarkən onun ailəsi Kaliforniyaya gəlir. Tippinin 18 yaşı olanda o, Nyu-Yorka gələrək bir model kimi öz karyerasını başlayır. 1950-ci ildə Tippi kinoda öz debütünü edir. Bu debüt "Balaca qız" musiqili komediyasındakı çox da böyük olmayan roldan ibarət idi. Lakin 1950–1960-cı illər arası Tippi Hedren özünün aktrisalıq fəaliyyətini davam etdirmir və yalnız bir model kimi işləyir.

1963-cü ildə ustad rejissor Alfred Hiçkok onu televiziya verilişlərinin birində görür və Tippi Hedreni yaxında çəkəcəyi "Quşlar" filmindəki Melani Deniels roluna dəvət edir. Rolu ifa etməyə razılıq verən Tippi sonradan bu obraza görə "Qızıl qlobus" (ən yaxşı aktrisa debütü) mükafatına layiq görülür. Daha sonra isə onun ifa etdiyi Melani rolu "Premiere" jurnalında dərc edilmiş bütün zamanların 100 ən möhtəşəm obrazını əks etdirən siyahıya düşmüşdür. Bu filmin uğurunun ardınca Tippi Hedren Hiçkokun daha bir filmində çəkilir. Bu, "Marni" adlanan psixoloji triller idi. Həmin filmdə Tippi Hedrenin tərəf-müqabili məşhur aktyor Şon Konneri idi.

Hiçkok Tippinin bənzərsiz ifasından sonradan çəkdiyi filmlərində də istifadə etməyi qərara aldı. Lakin Tippi Hedren artıq Hiçkokla işləməkdən imtina etdi. Bu qəfil imtina ona gətirib çıxardı ki, növbəti illərdə o, heç bir filmdə görünmədi. Səbəb isə ondan ibarət idi ki, Hiçkok onun rol təklifini rədd etdiyi üçün Tippi Hedrenə qarşı qəzəbli idi. Alfred Hiçkokun bütün bu illər ərzində kinematoqrafda tutduğu yer o qədər yüksəkdə idi ki, bütün rejissorlar onun fikrilə razılaşmış və Tippini heç bir filmə çəkməmişdilər. Yalnız 3 illik fasilədən sonra Çarli Çaplinin "Honq Konqdan olan qrafinya" filmində Marta roluna çəkilir.

1970-ci illərdə Hedren demək olar ki, filmlərdə heç çəkilməmişdi. Ancaq 1980-ci illərin əvvəllərində tez-tez televiziya ekranlarında və "Otel", "4400", "O qadın qətli yazıb", "Qaranlıq yerin nağılları" kimi bir çox seriallarda görünməyə başlayır.

Tippi 1952-ci ildə aktyor və prodüser Piter Qriffitlə ailə həyatı qurmuşdur. 1957-ci ildə onların ailəsində sonradan tanınmış aktrisa olmuş Melani Qriffit dünyaya gəlmişdir. 1961-ci ildə isə onların nikahı boşanma ilə sona çatdı. 1964-cü ildə Hedren öz agenti və çəkildiyi üç filmin prodüseri olan Noel Marşalla ərə gedir. 1982-ci ildə bu cütlük də boşanır. Onun üçüncü əri sahibkar Luis Barreneçi olmuşdur. Bu ailə 1985–1995-ci illərdə mövcud olmuşdur. 1995-ci ildə Luisdən boşanan Tippi 2002-ci ildə baytar həkim Martin Dinnesə ərə getmişdir.

• Aktrisa Melani Qriffitin anasıdır.

İl	Azərbaycanca adı	Orijinal adı	Rol
1950	Balaca qız	ing. The Petty Girl	Ays Boks
1963	Quşlar	ing. The Birds	Melani Deniels
1964	Marni	ing. Marnie	Marni Edqar
1967	Honkonqlu qrafinya	ing. A Countess from Hong Kong	Marta
1970	Pələng quyruğu	ing. Tiger by the Tail	Rita Armstronq
1970	İblisin məhsulu	ing. Satan's Harvest	Marla Oaks
1971	Cənab Kinqstritin müharibəsi	ing. Mister Kingstreet's War	Meri Kinqstrit
1973	Harrad təcrübəsi	ing. The Harrad Experiment	Marqaret Tenhauzen
1981	Nərilti	ing. Roar	Medelin
1982	Fosfor işığı	ing. Foxfire Light	Elizabet Morqan
1989	Ölümcül casus oyunları	ing. Deadly Spygames	Çestiti
1990	Gecənin soyuğunda	ing. In the Cold of the Night	Klara
1990	Pasifik-Hayts rayonu	ing. Pacific Heights	Florens Piters
1994	Terezanın tatuajı	ing. Teresa's Tattoo	Evelin Hill
1994	Qaçılmaz gözəl	ing. Inevitable Grace	Marsiya Stivens
1996	Vətəndaş Rut	ing. Citizen Ruth	Cessika Ueys
1997	Malliqanlar	ing. Mulligans!	Dotti
1998	Ayrılma	ing. Break Up	ana
1998	Öldüyüm gün tez ayıldım	ing. I Woke Up Early the Day I Died	Meylinda Osted
1999	Nağıl danışanlar	ing. The Storytellers	Lilian Qlosner
2001	Nənəmlə çay dəstgahı	ing. Tea with Grandma	Rae
2001	Meyvəli dondurma	ing. Ice Cream Sundae	xanım
2003	Heysmanın axtarışı	ing. Searching for Haizmann	Mişel Labner
2003	Qara canavar	ing. Dark Wolf	Meri
2003	Rouzun bağçası	ing. Rose's Garden	Rouz
2003	Culi və Cek	ing. Julie and Jack	Culi Maknil
2004	Dahinin oyanışı	ing. Raising Genius	Beyb
2004	Qəzəb fikri	ing. Mind Rage	Uilma Rendolf
2004	Ürək oğruları	ing. I Heart Huckabees	Meri Ceyn Hatçinson
2005	Sıfır brilyantı	ing. Diamond Zero	Eleanor Kelli
2007	Sonuncu müttəfiq: Robert Adamsın hekayəsi	ing. The Last Confederate: The Story of Robert Adams	xanım Adams
2007	Ölü yazısı	ing. Dead Write	Minni
2008	Onun xəstə arzusu	ing. Her Morbid Desires	Qloriya
2012	Ceyn Mensfildin maşını	ing. Jayne Mansfield's Car	Naomi Kolduell
2012	Pulsuz nümunələr	ing. Free Samples	Betti
2013	Babilə qayıdış	ing. Return to Babylon	xanım Pibodi
2015	Kabus və balina	ing. The Ghost and the Whale	Tippi