Qara Meza Tədqiqat Mərkəzi (ing. Black Mesa Research Facility) və ya sadəcə Qara Meza — "Half-Life" videooyununun və onun əlavələrinin, eləcə də remeyki olan "B

Qara Meza Tədqiqat Mərkəzi (ing. Black Mesa Research Facility) və ya sadəcə Qara Meza — "Half-Life" videooyununun və onun əlavələrinin, eləcə də remeyki olan "Black Mesa" oyununun əsas hadisə məkanı kimi çıxış edən uydurma yeraltı laboratoriya kompleksi. Bu həmçinin, "Half-Life" kainatının, o cümlədən "Portal" seriyasının bir hissəsidir. Kompleks ABŞ-nin Nyu-Meksiko ştatının səhralıq ərazisində, Soyuq müharibə dövrünə aid keçmiş raket sınaq poliqonunun yerində yerləşir və "Half-Life" seriyasının baş qəhrəmanı, nəzəri fizika üzrə alim Qordon Frimanın keçmiş iş yeri kimi təqdim olunur. Qara Meza eyni zamanda "Aperture Science" şirkətinin rəqibi hesab edilir. Rəsmi olaraq, hərbi-sənaye tədqiqatları ilə məşğul olduğu bildirilir, lakin obyektin teleportasiya sahəsində apardığı gizli eksperimentlər Zen adlı yadplanetli dünya ilə təmasın yaranmasına səbəb olmuş, alimlər bu dünyanın həyat formalarını və materiallarını məxfi şəkildə tədqiq etmişlər. Zendən gətirilmiş materiallar üzərində aparılan antimassa spektrometri təcrübəsi rezonans kaskadına yol açmış, bununla da yadplanetlilərin Yer planetinə hücum etməsinə şərait yaratmış və oyunlar silsiləsinin hadisələrinin əsas katalizatoruna çevrilmişdir.

Yaradılması

Seriyanın ssenari müəllifi Mark Leydlou ilkin mərhələdə Qara Meza üçün bir sıra potensial adlar nəzərdən keçirmiş, o cümlədən "Blek But Raket Bazası", "Diablo Düzənlikləri" və "Diablo Meza" variantlarını müzakirə etmişdir. "Half-Life 2: Raising the Bar" kitabında o, yekun seçim olaraq "Qara Mexa Tədqiqat Mərkəzi" adını seçməsindən məmnunluğunu ifadə etmiş və bunun "Blek But" variantından daha uyğun olduğunu bildirmişdir. Qara Mezanın elmi və qorxu elementləri qismən "Kənar hüdudlar" teleserialının "Sərhəd diyarı" adlı epizodundan ilhamlanmışdır. Həmin epizod maqnit sahələrini manipulyasiya edərək dördüncü ölçüyə daxil olmağa çalışan alimlər qrupuna həsr olunmuşdur.

Oyunçunu Qara Meza obyekti ilə tanış edən monorels səhnəsi ilkin olaraq texniki nümayiş məqsədi daşıyırdı. Leydlou qeyd etmişdir ki, proqramçı tərəfindən "func_tracktrain" adlı yeni oyun obyektinin — qatarların müxtəlif relslərə ayrılmasına, dönməsinə və geri qayıtmasına imkan verən mexanizmin tətbiqindən sonra bu nəqliyyat vasitəsini oyunun hekayəsinə daxil etmək qərarına gəlmişdir. Monorels marşrutu yükləmə ekranları olmadan altı ayrı xəritə faylından ibarətdir. Ardıcıl səviyyə keçidi təəssüratı yaratmaq üçün keçid zonaları kimi dəhlizlər əlavə edilmişdir.

Sınaq kamerasında baş verən fəlakət səhnələri tərtibatçılar Con Qatri və Kelli Beyli tərəfindən cəmi bir həftəsonu ərzində hazırlanmışdır. Onlar 48 saat fasiləsiz işləmiş, bu səhnəni yaratmış və nəticə etibarilə növbəti bazar ertəsi ofisdə çalışan hər kəsi gördükləri və oynadıqları zaman heyran etmişdilər.