Vardan Stepanyan (erm. Վարդան Ստեփանյան; 8 mart 1966, İrəvan – 3 iyul 1992, Mirikənd, Xocavənd rayonu), daha çox Düşmən Vardan kimi tanınır — Ermənistan hərbçis

Vardan Stepanyan
Vardan Stepanyan
	erm. Վարդան Ստեփանյան
Şəxsi məlumatlar
Doğum tarixi	8 mart 1966
Doğum yeri	İrəvan, Ermənistan SSR, SSRİ;
Vəfat tarixi	3 iyul 1992 (26 yaşında)
Vəfat yeri	Mirikənd, Xocavənd rayonu, Azərbaycan;
Dəfn yeri	Yerablur;
Vətəndaşlığı	Ermənistan;
Təhsili	İrəvan Dövlət Universiteti;
Hərbi fəaliyyəti
Mənsubiyyəti	Daşnaksutyun
Döyüşlər	SSRİ–Əfqanıstan müharibəsi,; Birinci Qarabağ müharibəsi;
Təltifləri

Vardan Stepanyan (erm. Վարդան Ստեփանյան; 8 mart 1966, İrəvan – 3 iyul 1992, Mirikənd, Xocavənd rayonu), daha çox Düşmən Vardan kimi tanınır — Ermənistan hərbçisi, Birinci Qarabağ müharibəsi iştirakçısı. O, Ermənistanda əhəmiyyətli bir hərbi komandir sayılır.

Həyatı

Erkən həyatı və Əfqanıstan

Vardan Stepanyan 9 mart 1966-cı ildə Ermənistan SSR-nin İrəvan şəhərində anadan olmuşdur. 1983-cü ildə İrəvanda yerləşən 32 saylı Tumanyan məktəbini bitirdikdən sonra Sovet Ordusuna çağırılmışdır. 1984–1986-cı illərdə Əfqanıstanda xidmət etmişdir. Oradakı xidmətlərinə görə Stepanyan "İgidliyə görə" medalı və "SSRİ Silahlı Qüvvələrinin 70 illiyi" yubiley medalı ilə təltif edilmişdir. Sovet Ordusundan tərxis olunduqdan sonra Stepanyan İrəvan Dövlət Universitetinin hüquq fakültəsinə qəbul olmuşdur.

Birinci Qarabağ müharibəsi

Stepanyan 1988-ci ilin əvvəlində Qarabağ hərəkatına qoşulmuşdur. O, əvvəlcə Qarabağ ermənilərinə silah və texnikanın verilməsində Əfqanıstan müharibəsinin erməni veteranları qrupuna rəhbərlik etmişdir. Stepanyan 1989-cu ildən İcevan, Noyemberyan, Şəmşəddin, Ararat, Vardenis və Gorusda döyüşlərdə iştirak etmişdir. 1991-ci ildə Birinci Qarabağ müharibəsinin qızışdığı bir vaxtda Stepanyan Qarabağa köçmüş, Xocalı, Meşəli, Kərkicahan, Malıbəyli, Laçın, Ağdərə, Əsgəran, Böyük Qaladərəsi və s. döyüşlərdə fəal iştirak etmişdir. 1991-ci ilin dekabrında sonuncu sovet qoşunları Azərbaycanı tərk etmişdir. Azərbaycan qoşunları tezliklə Qarabağın ən böyük şəhəri olan Xankəndini mühasirəyə almışdı. O, Xankəndi yaxınlıqlarında yerləşən Kərkicahanda Azərbaycan Silahlı Qüvvələrinə qarşı döyüşdə erməni döyüşçülərinə rəhbərlik etmişdir.

8–9 may 1992-ci il tarixlərində erməni qoşunları Şuşanı işğal etmişdilər. Stepanyan bu döyüşdə fəal iştirak etmişdir.

İrsi

Stepanyan Ermənistanın paytaxtı İrəvanda yerləşən Yerablur hərbi qəbiristanlığında dəfn edilmişdir. O, ölümündən sonra 1993-cü ildə Qondarma Dağlıq Qarabağ Respublikasının I dərəcəli "Döyüş xaçı" ordeni və 1996-cı ildə Ermənistanın II dərəcəli "Döyüş xaçı" ordeni ilə təltif edilmişdir.

İrəvan Dövlət Universitetinin hüquq fakültəsinin auditoriyalarından birinə 1994-cü ildə onun adı verilmişdir. Şuşada bir küçə "Düşmən Vardan Stepanyan" adlandırılmış, İrəvanda isə onun muzeyi fəaliyyət göstərir. Mirikənd kəndi yaxınlığında onun heykəli ucaldılmışdır.