Lavrens Eduard Peyc (ing. Lawrence Edward Page; 26 mart 1973[…], İst-Lensinq[d]) — amerikalı iş adamı, kompüter alimi və internet sahibkarı. Sergey Brin ilə bir

Lourens Edvard Peyc 26 mart 1973-cü ildə Miçiqan ştatının Lansinq şəhərində anadan olub. Anası yəhudidir. Peycin ailəsi sekulyar olmasına baxmayaraq, ana babası daha sonra İsrailə köçüb. Atası Karl Viktor Peyc Miçiqan Universitetində kompüter elmləri üzrə fəlsəfə doktoru dərəcəsi qazanıb. BBC müxbiri Vill Smeyl onu "kompüter elmləri və süni intellektdə qabaqcıl" kimi təsvir edib. Peycin atası Miçiqan Dövlət Universitetində (MDU) kompüter elmləri professoru, anası Qloriya isə həmin institutun Layman Brics Kollecində kompüter proqramlaşdırması üzrə təlimatçı olub. Larrinin valideynləri o səkkiz yaşında ikən boşanıb, lakin o, həm anası Qloriya, həm də atasının uzunmüddətli partnyoru və MDU professoru Coys Vildental ilə yaxşı münasibət saxlayıb.

Müsahibə zamanı Peyc uşaqlıq evinin "adətən hər yerdə kompüterlər, elm və texnologiya jurnalları və Popular Science jurnalları ilə dağınıq" olduğunu xatırlayırdı. Peyc 2013-cü ildə Google təsisçilərinə yazdığı məktubunda gənclik illərində həvəsli oxucu olduğunu bildirmişdi: "Kitab və jurnallara çox vaxt sərf etdiyimi xatırlayıram." Yazıçı Nikolas Karlsonun fikrincə, Peycin ev atmosferi və diqqətli valideynlərinin birlikdə verdiyi təsir onun "yaradıcılığına və ixtiraetmə qabiliyyətinə təkan verib". Peyc həmçinin müxtəlif musiqi alətlərində ifa edir və musiqi bəstəkarlığını öyrənirdi. Valideynləri onu musiqi yay düşərgəsinə göndərmişdilər. Peyc musiqi təhsilinin onun səbirsizliyini və hesablama sürətinə olan həvəsini ilhamlandırdığını bildirmişdi. Müsahibədə Peyc dedi ki, "musiqidə siz zamanı çox dərk edirsiniz. Zaman əsas şey kimidir" və "Əgər bunu musiqi nöqteyi-nəzərindən düşünürsənsə, zərb aləti ifaçısısansa, nəyisə vurursan, bu, millisaniyələrdə, saniyənin kəsirlərində baş verməlidir."

Peyc ilk dəfə 6 yaşında ikən kompüterlərə maraq göstərdi, çünki o, anası və atasından qalan birinci nəsil fərdi kompüterlərlə, yəni "ətrafında olan əşyalarla" oynamağı bacarırdı. O, "ibtidai sinifdə mətn prosessoru tapşırığını həll edən ilk uşaq" olmuşdu. Böyük qardaşı Karl Viktor ona əşyaları sökməyi öyrətmişdi. O, "çox erkən yaşlarımdan mən də bir şeylər icad etmək istədiyimi başa düşdüm. Buna görə də texnologiya və bizneslə maraqlandım. Yəqin ki, 12 yaşımdan sonra bir şirkət quracağımı bilirdim." demişdi.