Qazangöldağ — Naxçıvan Muxtar Respublikasının Ordubad rayonunda, Azərbaycan-Ermənistan sərhədində yerləşən zirvə.

Hündürlüyü 3829 m olan zirvə Kiçik Qafqaz dağlarının Zəngəzur silsiləsində yerləşir. Adı quruluşca mürəkkəb oronim olan dağın şərq yamaclarında — Ermənistan ərazisində eyniadlı kiçik dağ gölü olan Qazangöl, qərb yamaclarında — Ordubad rayonu ərazisində isə Göygöl yerləşir (hünd. 3829,2 m). Zəngəzur silsiləsinin suayırıcısinda zirvə. Nəsirvaz kəndindən 5 km-dək şimal-şərqdə, Nəsirvazçay və Saqqarsuçayın mənbə hissəsindədir. Orta Eosenin yaşlı sönmüş vulkan boğazına cavab verən, aqlomerat və brekçiyavari andezit-porfirit lavalarından təşkil olunmuş, sıldırım yamaclı və kəskin parçalanmış piramidaya bənzər qayalıqdır. Tektonik cəhətdən Ordubad qarılma və Zəngəzur qalxma zonalarını ayıran Şərqi Ordubad dərinlik qırılması zonasında yerləşir.