Yuri Tsolakoviç Oqanesyan (14 aprel 1933, Rostov-na-Donu, SSRİ) — super ağır kimyəvi elementlərin tədqiqatçısı kimi tanınan erməni əsilli rusiyalı nüvə fizikidi

1970-ci illərdə Oqanesyan transaktinid elementlərini (superağır elementlər) istehsal etmək texnikası olan "soyuq birləşmə" (ing. Cold fusion) metodunu kəşf etmişdir. Onların bir adı olsa da, bu prosesin soyuq birləşmə adlanan sübut olunmamış enerji istehsal prosesi ilə əlaqəsi yoxdur. Oqanesyan prosesi dövrü cədvəldəki 106-dan 113-ə qədər olan elementlərin kəşfi üçün həlledici əhəmiyyət kəsb etmişdir. 1970-ci illərin ortalarından 1990-cı illərin ortalarına qədər, Oqanesyan tərəfindən idarə olunan JINR və Almaniyadakı GSI Helmholtz Ağır İon Tədqiqatları Mərkəzinin müştərək işləri nəticəsində altı kimyəvi elementin (107-dən 112-ə qədər) kəşfi baş tutmuşdur: borium, meytnerium, hassium, darmştadtium, rentgenium və kopernisium.

Onun "isti birləşmə" (ing. Hot fusion, həmçinin enerji prosesi kimi nüvə sintezi ilə əlaqəsi yoxdur) adlandırılan daha yeni texnikası dövri cədvəlin yeddinci sırasını tamamlayaraq 113-dən 118-ə qədər elementlərin kəşfinə kömək etmişdir. Bu üsul siklotronda neytronlarla zəngin olan daha ağır radioaktiv elementləri ehtiva edən hədəflərə kalsiumun bombardman edilməsini nəzərdə tuturdu. Bu üsuldan istifadə etməklə kəşf edilən elementlər bunlardır: nihonium (2003; həmçinin Yaponiyada Riken tərəfindən soyuq birləşmədən istifadə edilərək kəşf edilmişdir), flerovium (1999), moskovium (2003), livermorium (2000), tennessin (2009) və oqaneson (2002).

2016-cı ilin əvvəlində elm yazıçıları və bloggerlər super ağır elementlərdən birinin oqanesium və ya oqaneson adlandırılacağını təxmin etmişdilər. Beynəlxalq Nəzəri və Tətbiqi Kimya İttifaqı (IUPAC) 2016-cı ilin noyabr ayında elan etmişdir ki, 118-ci element Oqanesyanın şərəfinə oqaneson adlandırılacaqdır. Bu element birinci dəfə 2002-ci ildə JINR-də Rus və Amerika alimlərinin müştərək qrupu tərəfindən müşahidə edilmişdir. Rəhbəri Oqanesyan olan komandanın tərkibinə Kaliforniya ştatında yerləşən Lourens Livermor Milli Laboratoriyasının amerikalı alimləri də daxil edilmişdilər. Bu elandan əvvəl onlarla elementə insan adı verilmişdi, lakin onlardan yalnız siborgium şərəfinə adlandırılmış şəxs (Qlenn Teodor Siborq) həyatda olarkən adlandırılmışdı. (Eynşteynium və fermium adları müvafiq olaraq Albert Eynşteyn və Enriko Fermi hələ sağ olarkən təklif edilmişdirlər; lakin bu elementlərin adları rəsmiləşdirildiyi zaman həm Eynşteyn, həm də Fermi həyatda deyildi.) Siborq 1999-cu ildə öldüyünə görə, Oqanesyan hal-hazırda həyatda olarkən adına element olan yeganə insandır.

1990-cı ildə Sovet Elmlər Akademiyasının müxbir üzvü, 2003-cü ildə isə Rusiya Elmlər Akademiyasının həqiqi üzvü (akademik) seçilmişdir.

Oganessian Frankfurt Höte Universitetinin (2002), Messina Universitetinin (2009), və İrəvan Dövlət Universitetinin (2022) fəxri diplomlarına layiq görülmüşdür. 2019-cu ildə Kembricdəki Sent Katarin Kollecinin fəxri üzvü seçilmişdir.