“Savalan” qrupu 2002-ci ildə Bakıda Novruz Novruzlu tərəfindən yaradılmışdır. Qrupun banisi və uzun illər bədii rəhbəri olmuş Novruz Novruzlunun vəfatından sonr

“Savalan” qrupu 2002-ci ildə Bakıda Novruz Novruzlu tərəfindən yaradılmışdır. Qrupun banisi və uzun illər bədii rəhbəri olmuş Novruz Novruzlunun vəfatından sonra kollektiv müəyyən müddət fəaliyyətini dayandırmış, lakin fasilədən sonra 2025-ci ildən etibarən İffət Əsgərovun rəhbərliyi ilə yenidən yaradıcılıq fəaliyyətinə başlamışdır.

Qrupun keçmiş heyəti Novruz Novruzlu (xanəndə və dəf), Həlimət Sultan (səs və bədii qiraət), Fəxrəddin Salim (saz və ud), Cavad İsmayıl (ney) və İffət Əsgərovdan (kamança) ibarət olmuşdur.

Hazırda qrupun mövcud tərkibi aşağıdakı kimidir:

• İffət Əsgərov – bədii rəhbər, bəstəkar, səs, kaman
• Azer Çələbi – solist
• Naser Nayyeri – solist
• Anar Quliyev – zərb alətləri
• Məhta Məmmədəlızadə – qanun
• Anar Vəlizadə – balaban

Repertuar etibarilə qrup əsasən — ilahilər, türkülər və bədii-musiqili kompozisiyalardan ibarətdir.

"Savalan" qrupu dəfələrlə xarici səfərlərdə, o cümlədən Hollandiyanın Haaqa şəhərində DAK-ın 6-cı qurultayında, həmçinin bir neçə dəfə Türkiyənin Konya şəhərində keçirilən 'Mövlana Cəlaləddin Rumini' anma törənlərində uğurla iştirak etmişdir. Pakistanda (2007-ci ilin may ayında) keçirilən "Dünya Mistik-Sufi Musiqi festivalı"nda iştirak edərək mükafata layiq görülmüş, Pakistan Mədəniyyət Nazirliyinin və festivalın Prezidentinin xüsusi diplomu ilə təltif olunmuşdur.

Ölkə daxilində qrup zəngin fəaliyytlə məşğuldur. Müxtəlif konsert və tədbirlərdə, maraqlı televiziya çıxışlarıyla cürbəcür proqramlarda, eyni zamanda xüsusi tərifnamə ilə təltif olunduğu "Xəzər Dəmir Donanması"nın şəxsi heyətinə verdiyi solo konsertlə, həmçinin Xəzər Universitetinin çoxsaylı tədbirlərindəki uğurlu çıxışlarıyla diqqəti cəlb etmişdir.

"Savalan"-ın ən maraqlı işlərindən biri Dövlət "Yuğ" teatrının kollektivi və baş rejissoru Vaqif İbrahimoğlu ilə birlikdə hazırladığı teatr tamaşalarıdır. Bunlardan biri Qalib Məmmədov və Fəxrəddin Salimin yaradıcılığından ibarət hazırlanmış "Üz tuturam Tanrıya" və ikincisi, böyük Yunus Əmrə dünyasını əhatə edən "Olsun" meditasion-ruhani göstəridir. Qrup dəfələrlə Türkiyənin TRT, TGRT, STV və İraqda yayımlanan Kərkük TV-də və həmçinin — AzTV, Space, ANS, Lider, İTV kanallarının verilişlərində tamaşaçılarda böyük rəğbət doğuran maraqlı çıxışlar etmişdir. Azərbaycan Dövlət televiziyası tərəfindən çəkilmiş "Seyid Nigari", "Yunus Əmrə", "Nəimi", "Təbriz" televiziya filmlərində musiqi parçaları ifaçısı olmuşdur.

"Savalan" qrupu 2009-cu il "Gün Az" TV-nin təklifi ilə iyulun 7-dən, 15-nə kimi ABŞ-in Çikaqo şəhərinə dəvət olunmuşdur. "Gün Az" TV-nin 4 illik yubileyi ilə əlaqədar olaraq qrup bir necə konsertlə çıxış etmişdir.

"Dədə-Qorqud"a həsr olunmuş tədbirlərdə qrupun, 30 sentyabr 2009-cu ildə Slavyan Universitetində və 2009-cu il 2 oktyabr tarixində Kapellhausda Almaniyadan gəlmiş musiqi qrupu ilə birlikdə konsert çıxışları olmuşdur.

Fasilədən sonra yenidən fəaliyyətə başladığı 2025-ci ildə “Savalan” qrupu solo konsert proqramını təqdim etmiş, həmçinin III Beynəlxalq Nəsimi Festivalında və “Baku Art Weekend – Fly to Baku” festivalında uğurla iştirak etmişdir.

Nəsimi Festivalı