Geğam Barseqoviç Antelepyan (erm. Գեղամ Բարսեղի Անտելեպյան; 1899, Mərzifon – 10 aprel 1966, Bakı) — sovet dövlət xadimi, Azərbaycan SSR Xalq Komissarları Soveti

Geğam Antelepyan
Geğam Antelepyan
	erm. Գեղամ Բարսեղի Անտելեպյան
Azərbaycan SSR Nazirlər Soveti sədrinin müavini — Dövlət Plan Komitəsinin sədri
	28 mart 1946 – 1 avqust 1947
Əvvəlki	vəzifənin adı dəyişdirilib
Sonrakı	Musa Əliyev
Azərbaycan SSR Xalq Komissarları Soveti sədrinin müavini — Dövlət Plan Komitəsinin sədri
	1942 – 28 mart 1946
Əvvəlki	İslam İslamzadə
Sonrakı	vəzifənin adı dəyişdirilib
Şəxsi məlumatlar
Doğum tarixi	1899
Doğum yeri	Mərzifon;
Vəfat tarixi	10 aprel 1966 (66–67 yaşında)
Vəfat yeri	Bakı, Azərbaycan SSR, SSRİ;
Partiya	Sovet İttifaqı Kommunist Partiyası (1920–1966);
Təhsili	Moskva Şərqşünaslıq İnstitutu (1925–1927),; Qırmızı Professorlar İnstitutu;
Təltifləri	;

Geğam Barseqoviç Antelepyan (erm. Գեղամ Բարսեղի Անտելեպյան; 1899, Mərzifon – 10 aprel 1966, Bakı) — sovet dövlət xadimi, Azərbaycan SSR Xalq Komissarları Soveti (Nazirlər Soveti) sədrinin müavini — Dövlət Plan Komitəsinin sədri (1942–1947), "Kommunist" (ermənicə) qəzetinin redaktoru (1931–1934, 1954–1959), II çağırış SSRİ Ali Sovetinin, IV və V çağırış Azərbaycan SSR Ali Sovetinin deputatı.

Həyatı

Geğam Barseqoviç Antelepyan 1899-cu ildə hazırkı Türkiyə Respublikasının Mərzifon şəhərində müəllim ailəsində doğulmuşdur. İbtidai məktəbi bitirdikdən sonra bir neçə il ticarət müəssisələrində çalışmış, 1920-ci ilin yayında əvvəlcə Batuma, sonra isə Tiflisə gəlmişdir. Həmin ilin oktyabrında Tiflisdə gizli bolşevik partiyasının üzvü olmuşdur.

Hazırkı Ermənistan ərazisində sovet hakimiyyəti qurulduqdan sonra, 1921-ci ilin yanvar ayında Geğam Antelepyan İrəvana gəlmiş, bundan bir müddət sonra isə ailəsi də ora köçmüşdür. Geğam Antelepyan burada Ermənistan SSR Xalq Xarici İşlər Komissarlığında, sonra isə Ermənistan SSR Xalq Komissarları Sovetində məlumat şöbəsinin müdiri işləmişdir. 1923–1925-ci illərdə Teleqraf Agentliyinə (hazırkı "Armenpress") rəhbərlik etmişdir.

1925-ci ildə Geğam Antelepyan Moskvaya gedərək buradakı Şərqşünaslıq İnstitutunda təhsil almış, 1927-ci buranı bitirərək Azərbaycana gəlmişdir. O, Azərbaycan Kommunist (bolşeviklər) Partiyası Mərkəzi Komitəsində çalışmağa başlamış, Mərkəzi Komitənin Mətbuat şöbəsinin təlimatçısı, ardınca Azərbaycanda Sinfi Mübarizənin və Kommunist Partiyasının Tarixini Öyrənən İnstitutda şöbə müdiri, 1931-ci ildən 1934-cü ilədək isə "Kommunist" (ermənicə) qəzetinin məsul redaktoru işləmişdir.

Geğam Antelepyan yenidən Moskvaya gedərək Qırmızı Professorlar İnstitutunda təhsil almış, Bakıya qayıtdıqdan sonra, 1938-ci ildə Azərbaycan SSR Xalq Komissarları Soveti yanında Dövlət Plan Komitəsi sədrinin müavini, 1942-ci ildə isə sədri təyin edilmişdir. 1947–1948-ci illərdə Azərbaycan KP MK-nın Kənd təsərrüfatı şöbəsi müdirinin müavini, 1948–1954-cü illərdə Azərbaycan Həmkarlar İttifaqları Şurası sədrinin müavini, 1954-cü ildən isə yenidən "Kommunist" (ermənicə) qəzetinin redaktoru olmuşdur. Həyatının sonlarına yaxın Azərbaycan SSR Nazirlər Sovetində çalışmışdır.

Geğam Antelepyan II çağırış SSRİ Ali Sovetinin, IV və V çağırış Azərbaycan SSR Ali Sovetinin, habelə Bakı Şəhər Sovetinin deputatı seçilmiş, Azərbaycan KP MK üzvlüyünə namizəd olmuşdur. "Lenin", "Qırmızı əmək bayrağı" ordenləri və medallarla təltif edilmişdir.

Geğam Antelepyan 10 aprel 1966-cı ildə vəfat etmişdir.