Araz Hidayət oğlu Zeynalov (7 iyul 1961, Bakı – 3 avqust 2022, Bakı) — azərbaycanlı jurnalist, publisist.

Araz Zeynalov 1961-ci il iyulun 7-də Bakı şəhərində jurnalist ailəsində dünyaya gəlib. 1978–1983-cü illərdə Bakı Dövlət Universitetinin Jurnalistika fakültəsində təhsil alıb. Əməkdar jurnalist, "Qızıl qələm" mükafatı laureatı Hidayət Zeynalovun oğludur. O, həm də AiD kimi tanınan azərbaycanlı repçi Orxan Zeynallının atasıdır.

A. Zeynalov uzun illər jurnalist fəaliyyəti ilə məşğul olub. O, "Azərbaycan gəncləri", "Panorama", "Kaspiy" qəzetlərində çalışıb. O, rusdilli vesti.az saytının ilk baş redaktoru olub. Uzun illər bu sayta rəhbərlik edib. 2012-ci ildə "Vesti.az" İnformasiya Agentliyi MMC-nin baş direktoru idi.

4 noyabr 2016-cı ildə "Vesti.Az" informasiya agentliyinin baş direktoru Araz Zeynalov və Pravda.Ru internet mediaxoldinqinin baş direktoru İnna Novikova görüş keçirmişdilər və informasiya əməkdaşlığına dair sənəd imzalamışdılar.

Xəstəlik iş imkanlarını məhdudlaşdırandan sonra, Araz Zeynalov bir müddət vesti.az saytının baş redaktorunun müşaviri kimi çalışıb.

Azərbaycanın bir neçə media təmsilçisi Araz Zeynalovun səhhətində yaranmış ağır vəziyyəti ilə bağlı Azərbaycan Prezidenti İlham Əliyevə müraciət ünvanlamışdı. Müraciətdən sonra Azərbaycan Respublikasının Medianın İnkişafı Agentliyinin rəhbərliyi və kollektivi Araz Zeynalovun ailə üzvləri ilə görüşüb, onun səhhəti ilə maraqlanmışdı.

A. Zeynalov 2022-ci il avqustun 3-də Bakı şəhərində uzun sürən xəstəlikdən dünyasını dəyişib. Mətbuat Şurası ölümüylə əlaqədar nekroloq imzalayıb. Avqustun 4-də Yasamal qəbiristanlığında torpağa tapşırılıb.

10 sentyabr 2022-ci il tarixində APA xəbər verdi ki, Araz Zeynalovun xatirəsinə APA TV tərəfindən 27 dəqiqəlik "Yaddaşın daimiliyi" sənədli film çəkilibdir.