Zəminə Dünyamalı qızı Dünyamalıyeva (1957, Şelli, Ağdam rayonu) — azərbaycanlı dövlət və siyasi xadim, Azərbaycan Respublikasının Milli Məclisinin I çağırış dep

1995–1998-ci illərdə Yeni Azərbaycan Partiyasının üzvü və YAP Ağdam Rayon Şöbəsinin sədri olub.

1993–1996-cı illərdə Azərbaycan parlamentlərinə rəhbərlik etmiş, hakim Yeni Azərbaycan Partiyası üzvü Rəsul Quliyev 11 sentyabr 1996-cı ildə Milli Məclisin sədri postundan istefa verərək Amerika Birləşmiş Ştatlarına köçmüşdü. 29 noyabr 1998-ci ildə keçirilən Azərbaycan Demokrat Partiyasının VI (Birləşdirici) Qurultay Səlahiyyətli Konfransında onun rəhbərlik etdiyi Beynəlxalq Demokratiya və Ekologiya Fondu və Aydın Quliyevin rəhbərlik etdiyi Demokratik Azərbaycan Partiyası Azərbaycan Demokrat Partiyasına birləşmişdir. Birləşmədən sonra partiyada həmsədrlik postu təsis edilmiş, İlyas İsmayılov və Rəsul Quliyev partiyanın həmsədrləri seçilmişdir.

Birləşmələrin ardınca partiya güclənmiş və partiyaya siyasi axın başlamışdır. Belə ki, partiyanın rəsmi dövlət qeydiyyatı olmamasına baxmayaraq Azərbaycan Respublikasının Milli Məclisinin I çağırış deputatlarından 31 saylı Birinci Kəpəz (Gəncə şəhəri) seçki dairəsindən seçilmiş Şamil Yusifov, 58 saylı Biləsuvar seçki dairəsindən deputat seçilmiş Akif Şahbazov, 85 saylı Samux-Goranboy seçki dairəsindən deputat seçilmiş Solmaz Ələsgərova, 100 saylı Şəmkir kənd seçki dairəsindən deputat seçilmiş Mahir Əsədov və Yeni Azərbaycan Partiyasının proposional sistem üzrə siyahısı üzrə deputat seçilmiş Zəminə Dünyamalıyeva mənsub olduqları hakim Yeni Azərbaycan Partiyasından istefa verərək Azərbaycan Demokrat Partiyasına üzv olmuşdur. Onlarla bərabər 33 saylı Birinci Nizami seçki dairəsi üzrə seçilmiş bitərəf deputat Yusif Bağırzadə və iyul 1996-cı ildə keçirilən təkrar seçkilərlə seçilmiş bitərəf deputat Umar Əfəndiyev də Azərbaycan Demokrat Partiyasına üzv olmuşdur.

2007-ci ildə Azərbaycan Demokrat Partiyası daxilində qruplaşma yaranmış və partiya Sərdar Cəlaloğlu və Rəsul Quliyev liderliyində 2 qola bölünmüşdür. 14 aprel 2007-ci ildə Rəsul Quliyev və tərəfdarları qurultay keçirdi. Qurultayda Azərbaycan Demokrat Partiyası adından imtina edilərək Açıq Cəmiyyət Partiyasının yaradıldığı elan olundu. Solmaz Ələsgərova, Zəminə Dünyamalıyeva, Akif Şahbazov və Mahir Əsədov da bu partiyaya qatıldı. Yeni yaranan partiyanın sədri Akif Şahbazov seçildi. Bu partiya dövlət qeydiyyatına alınmadı. 23 iyun 2009-cu ildə Akif Şahbazov partiya sədrliyindən istefa verdi. Partiya sədrinin səlahiyyətlərini Vaqif Mahmudov icra etməyə başladı. 21 sentyabr 2009-cu il tarixli Ali Məclis iclasında Vaqif Mahmudov sədr seçildi. Hər iki sədrin fəaliyyətini şiddətlə tənqid edən Zəminə Dünyamalıyeva isə Ali Məclisin qərarı ilə partiyadan uzaqlaşdırıldı. 12 may 2012-ci ildə partiya Ali Məclisinin iclasında Vaqif Mahmudovun istefası qəbul olunmuş, Sülhəddin Əkbər isə partiya sədri seçilmişdir. 14 iyunda isə Sülhəddin Əkbərin qərarı ilə Zəminə Dünyamalıyeva partiyaya bərpa olunaraq sədrin təşkilati işlər üzrə müavini vəzifəsinə təyin olunmuşdur. O, partiyada sədr müavini və Ali Məclis sədri vəzifələrini tutmuşdur. Zəminə Dünyamalıyeva həmçinin bir müddət Demokratik Qüvvələrin Milli Şurasında da təmsil olunmuşdur, lakin o, Solmaz Ələsgərova ilə birgə 2013-cü ildə keçirilmiş prezident seçkilərində Demokratik Qüvvələrin Milli Şurasının məğlub olması səbəbi ilə hər iki qurumdan 16 oktyabr 2013 tarixində istefa vermişdir.

Zəminə Dünyamalıyeva 2019-cu ildə Haqq Ədalət Partiyasının quruluşunda iştirak etmiş, 25 yanvar 2020 tarixində keçirilən Haqq Ədalət Partiyası Təsis Konfransında partiya sədrinin müavini və İdarə Heyətinin üzvü seçilmişdir. Haqq Ədalət Partiyası İdarə Heyətinin 30 oktyabr 2021-ci ildə keçirilən iclasında 5 aydan artıqdır partiya fəaliyyəti göstərməyən və xaricdə olan Zəminə Dünyamalıyeva səs çoxluğu ilə İdarə Heyətinin üzvlüyündən, sədr müavinliyindən və partiya sıralarından ixrac olunmuşdur.

Sərdar Cəlaloğlu Zəminə Dünyamalıyevanın bir müddət Abutalıb Səmədovun sədri olduğu Azərbaycan Naminə Alyans Partiyasının üzvü olduğunu iddia etmişdir.