Ər-Risalə (ərəb. الرسالة‎) və ya Risalə əl-Quşeyriyyə (ərəb. الرسالة القشيرية‎) — təsəvvüflə bağlı qələmə alınmış klassik əsərlərdən biri.

"Ər-Risalə"nin müəllifi sünni kəlam, təfsir və hədis alimi Quşeyridir.

"Ər-Risalə" hicri 437–438-ci (1045–1046) illərdə Nişaburda qələmə alınmış olub, 1 giriş və 55 bölmədən (bab) ibarətdir. Əsərdə sufilərin əqidə və tövhid məsələləri haqqındakı inancları, müridlik ədəbi, sufilərin İslam dinindəki yeri, sufiliyin əhəmiyyəti və başqa mövzulardan bəhs olunur.

Əsərin birinci bölməsində 83 sufinin dini və şəriət hökmlərinə olan sadiqliyindən bəhs edilir. Quşeyri bu bölməni qələmə alarkən mənbə kimi Məhəmməd ibn Hüseyn əs-Süləminin "Təbəqətüs-sufiyyə"sindən bəhrələnmişdir.

Əsərin ikinci bölmədində vəcd, fəna, cəm, bəst, üns, təcəlli və s. kimi hallardan söhbət açalır. Əsərin yerdə qalan 53 bölməsi isə tövbə, vəra, təqva, zöhd, fəqr, səbir, şükür, təvəkkül, rza, yəqin, rəca, həvf, dua, zikr, vilayət, kəramət, kəşf, röya, ədəb, əxlaq, söhbət, səma, ölüm və s. kimi təsəvvüfi mövzulara ayırılmışdır.

"Ər-Risalə" bir çox sufi üzərində təsirli olmuş, İbn Teymiyyə və İbn Qeyyim əl-Cövziyyə kimi Hənbəlilərin diqqətini cəlb etmişdir: İbn Teymiyyə "əl-İstiqamə" adlı əsəri "ər-Risalə"nin şərhi mahiyyətində qələmə almış, İbn Qeyyim isə "Mədaricüs-salikin" adlı əsərində Xacə Abdullah əl-Hərəvinin görüşlərini şərh edərkən "ər-Risalə"dən bəhrələnmişdir.

Əsərə haşiyə və şərhlər yazılmış, türk, fars, alman, ingilis və fransız dillərinə tərcümə edilmişdir. "Ər-Risalə"nin müxtəlif nəşrləri həyata keçirilmişdir (Bulaq: hicri 1284, Qahirə: 1966, Beyrut: 1993 və s.).

• Sünni kitablarının siyahısı