Məhərrəm Paşa oğlu Zülfüqarlı (19 avqust 1955, Ucar) — Azərbaycan ictimai-siyasi xadimi, tarixçi, tarix elmləri doktoru, professor.

19 avqust 1955-ci il Ucar şəhərində anadan olub. 1972-ci ildə 2 saylı Ucar şəhər orta məktəbi fərqləmə ilə bitirib Azərbaycan Dövlət Universitetinin (hazırda BDU) tarix fakültəsinin əyani şöbəsinə daxil olub.

1977–1980-ci illərdə dövlət təyinatı ilə Saatlı rayonu Nərimankənd orta məktəbində müəllim, 1980–1981-ci illərdə Azərbaycan SSR EA Tarix İnstitutunda baş laborant, 1981–1992-ci illərdə Azərbaycan Neft və Kimya İnstitutunun Sumqayıt filialında baş müəllim, 1992–1993-cü illərdə Sumqayıt şəhər İcra Hakimiyyəti başçısı aparatında humanitar məsələlər üzrə şöbə müdir, 1998–2000-ci illərdə Bakı Dövlət Universitetində baş müəllim, 2000–2001-ci illərdə Bakı Biznes Universitetində baş müəllim, “Magistratura şöbəsi”nin müdiri vəzifələrində çalışıb. 2017–2020-ci illərdə Azərbaycan Dövlət Pedaqoji Universitetində, 2023–2024-cü illərdə Azərbaycan Universitetində “Azərbaycan tarixi” fənnini tədris edib.

2007-ci ildən Azərbaycan Turizm və Menecment Universitetində işləyir. 2010–2018-ci illərdə Azərbaycan Turizm və Menecment Universitetinin elmi katibi olmuş, Universitetdə nəşr olunan "Turizm və otelçilik tədqiqatları" jurnalının məsul katibi vəzifəsində çalışmış, hazırda “H. Əliyev lektoriyası”nın rəhbəri, "İctimai fənlər kafedrası"nın professorudur. 2017–2023-cü illərdə universitetdə nəşr olunan, Azərbaycan Respublikası Prezidenti yanında Ali Attestasiya Komissiyası Rəyasət Heyətinin nəşr üçün töfsiyyə etdiyi "Turizm və Qonaqpərvərlik" beynəlxalq elmi jurnalın məsul katibidir.

1990-cı ilin iyununda BDU-nun tarix fakültəsinin Müdafiə Şurasında dissertasiya müdafiə edərək tarix elmləri namizədi alimlik dərəcəsinə, 2010-cu ildə dosent elmi adına layiq görülüb. 27 yanvar 2018-ci il tarixdə BDU-nun Tarix fakültəsinin Müdafiə Şurasında dissertasiya müdafiə edərək Azərbaycan Respublikası Prezidenti yanında Ali Attestasiya Komissiyasının Rəyasət Heyətinin 4 iyul 2018-ci il tarixli qərarı ilə tarix üzrə elmlər doktoru elmi dərəcəsinə, 7 oktyabr 2022-ci il tarixli qərarı ilə elmi-pedaqoji fəaliyyətinə görə professor elmi adına layiq görülüb. AMEA Tarix İnsititutunun nəzdində tarix üzrə elmlər doktoru və fəlsəfə doktoru elmi dərəcələri almaq üçün təşkil olunmuş Müdafiə Şurasının üzvüdür.

Türkiyə, Quzey Kipr, ABŞ, Almaniya, İsveç, Belçika, Polşa, Bolqarıstan, İran, Rusiya, Gürcüstan və s. dövlətlərdə keçirilmiş elmi-praktik konfranslarda və digər tədbirlərdə iştirak edib.

Azərbaycan, türk, rus, ingilis, fransız, alman, italyan, ispan, potuqal və fars dillərində nəşr olunmuş 219 elmi əsərin, o cümlədən 103 kitabın, 108 elmi məqalənin, 8 medodik işin, 610  qəzet məqaləsini müəllifidir.

1988–1991-ci illər Azərbaycan Milli Azadlıq hərəkatının fəal iştirakçısı, Azərbaycan Xalq Cəbhəsi Sumqayıt təşkilatı İdarə Heyətinin üzvü, 1993–1994-cü illərdə AXC Sumqayıt Təşkilatının Sədri, 1996–2004-cü illərdə Azərbaycan Milli İstiqlal Partiyası sədrinin "Təbliğat və Mətbuat üzrə" müavini olmuşdur.

2004–2005-ci illər Azərbaycan Milli Araşdırma Assosiasiyasının icraçı direktoru, 2005–2025-ci illər İctimai Problemlərin Tədqiqi Assosiasiyasının sədri, 2007–2024-ci illər Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Seçki Qərargahının sədri, virtse prezidenti, Korrupsiyaya qarşı mübarizə fondunun eksperti, Milli QHT Forumu İdarə heyətinin üzvü (2008–2022), Jurnalistlər birliyinin üzvü. Uzun illər "525-ci qəzet", "Ədalət" qəzetlərində köşə yazarı olub. Hazırda "Bakı Xəbər" qəzeti ilə əməkdaşlıq edir.

• Azərbaycan Respublikası Prezidentinin 27 may 2019-cu il 1205 nömrəli sərancamı ilə “Azərbaycan Xalq Cümhuriyyətinin 100 illiyi (1918-2018)” yubley medalı
• Şah İsmayıl Xətainin fəaliyyətinə həsr olunmuş beynəlxalq elmi konfransın (İİR Ərdəbil şəhəri 06 Avqust 2014) qızıl nişanı, stolüstü medalı 
• Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının Fəxri Fərmanı (2015-ci il)
• Millli QHT Foruumunun İdarə Heyətinin Fəxri Fərmanı (2005-ci il) 
• Azərbaycan Turizm və Menecment Universiteti Rektorunun Fəxri Fərmanları (2015 və 2022-ci illərdə) illər