Çin aktinidiyası (lat. Actinidia chinensis) — bitkilər aləminin erikaçiçəklilər dəstəsinin aktinidiyakimilər fəsiləsinin aktinidiya cinsinə aid bitki növü.

Cənub Şərqi Asiyada bitir.

Yarpaqları tökülən kol lianasıdır. Çin aktinidiyasının meyvələri "kivi" kimi tanınmışdır. Tumurcuqları tamamilə və ya bir hissəsi yarpaq yarıqlarında gizlənmişdir. Yarpaqları növbəli, bütöv, kənarları dişlidir, yalançı zoğları yoxdur. Çiçəkləri müxtəlif ölçülü (diametri 1-1,5-dən 3 sm-ədək), yarpaqların qoltuqlarında üç-üç və ya tək yığılmışdır. Çiçəkyanlığı iki və ya 4-5 hissəlidir. Çiçək tacı kasaşəkillidir, ağ, qızılı-sarı və ya narıncı rəngli çiçəkləri olur. Sütuncuqları 8-15 ədəd, sapvari, bünövrəsində bitişik və üstə əyilmişdir. Meyvəsi uzunsov giləmeyvə, sarı-yaşıl və ya açıq-narıncı,yeməlidir.

Şaxtayadavamlılığı zəifdir. Minerallarla zəngin torpaqlarda bitir. Qrunt sularına tab gətirmir.

Lənkəranda, Astarada, Qubada, Zaqatalada, Balakəndə mədəni şəraitdə becərilir.

Meyvəsi iyli, turşaşirin, yeməlidir. Tərkibində çoxlu vitamin vardır. Şaquli yaşıllaşdırmada geniş istifadə olunan sarmaşan bitkidir.

• Actinidia chinensis var. chinensis
• Actinidia chinensis var. deliciosa (A.Chev.) A.Chev.
• Actinidia chinensis var. setosa H.L.Li