İslam Şirin oğlu Qədimov (1907, Şuşa – 1973) — Azərbaycan dövlət xadimi, Azərbaycan SSR xalq kommunal təsərrüfatı komissarı və naziri (1944–1948).

İslam Şirin oğlu Qədimov 1907-ci ildə Şuşa şəhərində anadan olmuşdur. Orta məktəbi bitirdikdən sonra Leninqrad Politexnik İnstitutuna qəbul olunmuş və 1930-cu ildə buranı tamamlamışdır. Həmin il Azərbaycan SSR Xalq Kommunal Təsərrüfatı Komissarlığının əsaslı tikinti trestinə rəis təyin edilmişdir. Sonra isə komissarlığın plan-iqtisad idarəsində rəis vəzifəs və 1941-ci ilədək bu idarədə çalışmışdır. Paralel olaraq Azərbaycan Sosial-İqtisad İnstitutunda təhsil almış və 1932-ci ildə buranı bitirmişdir.

İslam Qədimov 1941-ci ildə cəbhəyə yollanmışdır. 1944-cü ilədək İkinci Dünya müharibəsində iştirak etmişdir. Leytenant rütbəsindən mayor rütbəsinədək yüksəlmiş və bir çox döyüş nişanları ilə təltif edilmiş və 1944-cü ildə Azərbaycan KP MK-nin çağırışı ilə ordudan tərxis olunmuşdur. Sonra isə Azərbaycan SSR xalq kommunal təsərrüfatı komissarı təyin edilmişdir. 1946-cı ildə bu komissarlıq nazirliklə əvəzlənmiş və o, 1948-ci ilədək Azərbaycan SSR kommunal təsərrüfatı naziri vəzifəsində çalışmışdır. Bu vəzifədə bir çox dövlət nişanları ilə təltif edilmişdir.

1948-ci ildən 1966-cı ilədək ölkənin bir çox şəhər və rayonlarının tikinti sahələrində rəhbər vəzifələrində işləmişdir. Bakı zərif mahudlar fabrikinin, Q. Musabəyov adına mexaniki zavodun, Şamaxı rəsədxanasının və onlarla respublika əhəmiyyətli tikintinin inşasına başçılıq etmişdir. 1966-cı ildən "Azkəndtikinti" trestinə rəis təyin edilmişdir. Ömrünün sonunadək burada çalışmışdır.

İslam Qədimov 1973-cü ildə vəfat etmişdir.