Əbu Xəttab Qətadə ibn Diama ibn Qətadə əs-Sədusi əl-Bəsri (ərəb. قتادة‎; 680 və ya 681 – 736, Vasit mühafəzəsi) — Tabiin nəslinə mənsub müfəssir.

Abdullah ibn Sərcis, Ənəs ibn Malik, Səid ibn əl-Müseyyib, Muaz ibn Əbu Tüfeyl və başqalarından elm almışdır. Misar ibn Kidəm, Səid ibn Əbu Ərubə, Şöbə, Həmmad ibn Sələmə, Əbu Hənifə və başqaları ona tələbəlik etmişdir. Dövrünün məşhur müfəssirlərindən olmuşdur. Qurani-Kərimin hər bir ayəsi haqqında ən azı bir rəvayət (hədis) bildiyini söyləyərmiş. Əhməd ibn Hənbəl onu mədh etmiş, onun elmini yüksək qiymətləndirmişdir. Qədəriyyə görüşünə mənsub olmasına baxmayaraq bir çox görkəmli alimlər ondan elm öyrənməkdən imtina etməmişlərdir. Hicri 118-ci ildə, təxminən 56 yaşında ikən vəfat etmişdir.

"Kitabun-Nəsix vəl-Mənsux fi Kitabillah", "Kitabul-Mənasik", "ət-Təfsir" və "Əvaşirul-Quran" adlı əsərlərin ona aid olduğu deyilir.