Paket kommutasiyası (packet switching) – verilənlərin ötürülməsi üsuludur. Bu üsulda göndərən və qəbul edən tərəflər arasında informasiya kiçik vahidlərə-paketl

Paket kommutasiyası (packet switching) – verilənlərin ötürülməsi üsuludur. Bu üsulda göndərən və qəbul edən tərəflər arasında informasiya kiçik vahidlərə-paketlərə bölünərək, optimal marşrutla kompüter şəbəkəsinin stansiyalarından keçməklə retranslyasiya olunur. Paket kommutasiyalı şəbəkədə informasiya kiçik porsiyalarla emal edilir; uzun məlumatlar marşrutlanmadan əvvəl bir neçə paketə ayrılır. Hər bir paket müxtəlif yollarla ötürülə bildiyindən və məlumatı təşkil edən paketlər son məntəqəyə müxtəlif vaxtlarda və ya fərqli ardıcıllıqla çata bildiyindən, qəbuledici kompüter ilkin məlumatı yenidən qurur. Məlumatların paketlənməsi prosesi paketlərin qurulması və sökülməsi adlanır (Packet Assembly and Disassembly – PAD). Paket kommutasiyalı şəbəkələr ən sürətli və səmərəli hesab olunur. Trafikin marşrutlanması və paketlərin qurulub-sökülməsi prosesinin idarə olunması üçün bu cür şəbəkələrdə ötürməni idarə edən kompüterlər və proqram təminatları müəyyən səviyyədə “intellekt”ə malik olmalıdır. Şəbəkələrdə paket kommutasiyası Beynəlxalq Telekommunikasiya İttifaqının (CCITT) X.25 tövsiyəsində sənədləşdirilmişdir.