Kəramət Qəşəm oğlu Nəcəfov, professional adı ilə Kəramət Böyükçöl (17 oktyabr 1987, Əliqullar, İmişli rayonu) — Azərbaycan yazıçısı və publisisti.

Kəramət Qəşəm oğlu Nəcəfov 17 oktyabr 1987-ci ildə İmişli rayonunun Əliqulular kəndində anadan olub. Atası Qəşəm Nəcəfzadə tələbə yoldaşı və şair Kəramət Şükürovun adını ona qoyub. Səbail rayonundakı 51 saylı orta məktəbi bitirib. 2007–2011-ci illərdə Bakı Dövlət Universitetinin Filologiya fakültəsində təhsil alıb.

2010-cu ildə Azərbaycan Yazıçılar Birliyinə üzv olmuşdur. 11 noyabr 2015-ci ildə sərt tənqidləri və çıxışları səbəbilə Azərbaycan Yazıçılar Birliyinin üzvlüyündən kənarlaşdırılıb. Böyükçöl üzvlükdən kənarlaşdırılqdan sonra da davamlı olaraq Azərbaycan Yazıçılar Birliyini və onun üzvlərini tənqid edir.

Böyükçöl 18 avqust 2020-ci ildə kirayə qaldığı bir evdə sərxoş halda "Facebook" hesabından açdığı canlı yayımda hökuməti və sənətçiləri tənqid edərkən polis tərəfindən basılmış və zor tətbiq edilərək saxlanılmışdır. Polis verdiyi açıqlamada qonşuların bu vəziyyətdən narahat olduğunu və şikayət etdiklərini bildirmişdir. Həmçinin polis yazıçının pis vəziyyətdə olduğunu və intihar edəcəyindən şübhələndiklərini bildirmişdir. Böyükçöl bir gün sonra sərbəst buraxılmış və yazıçının xəstəxanada məcburi müalicəsinə başlanılmışdır.

"YouTube" kanalında "Kəramətinə şükür" adlı həftəlik proqram hazırlamış və bu proqramda siyasi və ictimai mövzular müzakirə edilmişdir.

7 oktyabr 2021-ci ildə sağlamlıq problemləri ilə əlaqədar olaraq təkrar məcburi müalicə üçün Bakı Şəhər Narkoloji Dispanserə yerləşdirilmiş və 3 həftə sonra, 26 oktyabr 2021-ci ildə müalicəsini tamamlayaraq buraxılmışdır.

2023-cü ildə "Elçibəyin sirri" adlı kitabını oxucularına təqdim etmişdir.

Uzun müddət fəaliyyətini səyyar kitab satıcısı kimi davam etdirən Böyükçöl 31 yanvar 2024-cü ildə Kerazon adlı kitab mağazasını açmışdır. O, daha sonra bu mağazanı bağlamışdır və "qazel" alaraq satıcılıq fəaliyyətinə "yeriyən kitab mağazası" ilə Azərbaycanın regionlarında davam edəcəyini bildirmişdir. O, 2025-ci ilin avqustunda "Böyükçöl" adlı mikroavtobus səyyar kitab evini açmışdır.

Böyükçöl sazı "cahillik aləti" adlandırıb və "meyxana kimi bir şey" olduğunu bildirib.

İki dəfə evlənib və ilk evliliyindən Jasmin adında bir qızı, ikinci evliliyindən Barış adında bir oğlu var. Yazıçı və publisist Qəşəm Nəcəfzadənin oğludur. Böyükçölün bir bacısı və bir qardaşı var.

• Çatlamış fincan, Bakı: Araz, 2009. 58 səh.
• Çöl, Bakı, 2010. (təkrar nəşr: Bakı: Qanun, 2020; Bakı: Qanun, 2023)
• Səkkizinci gün, Bakı, Qanun, 2014, 240 səh. (təkrar nəşr: Bakı: Qanun, 2020; Bakı: 2023.)
• Pozğun, Bakı: Zero, 2014.
• Məni kim tapa bilər?, Bakı, Mücrü nəşriyyatı, 2020. 128 səh. (təkrar nəşr: Bakı: Qanun, 2021.)
• Əlqəmə, 2021 (təkrar nəşr: Bakı: 2023.)
• Elçibəyin sirri. Bakı, 2023, 260 səh.
• Səs, Bakı, 2023. (təkrar nəşr: Bakı: Kerazon, 2024.)
• Fərarinin həyat sevgisi, Bakı: Kerazon, 2024.