Günay Elçin qızı Əfəndiyeva — Azərbaycanlı ictimai–siyasi xadim, diplomat. Milli Məclisin deputatı və Mədəniyyət komitəsinin sədr müavini, Qırğız Respublikasını

Günay Elçin qızı Əfəndiyeva 20 oktyabr 1973-cü ildə Bakı şəhərində görkəmli yazıçılar İlyas Əfəndiyev və Elçin Əfəndiyevin ailəsində anadan olmuşdur.

1991-ci ildə Bülbül adına orta ixtisas musiqi məktəbini qızıl medalla bitirmişdir. 1997-ci ildə Azərbaycan Tibb Universitetini qırmızı diplomla həkimlik ixtisası üzrə bitirmişdir. 1997–1998-ci illərdə Bakı şəhəri Respublika Diaqnostika Mərkəzində fuksional diaqnostika üzrə internatura keçmişdir.

Ailəsi

• Azərbaycanın görkəmli yazıçısı, Azərbaycan Respublikasının xalq yazıçısı, Azərbaycan Respublikası Baş Nazirinin keçmiş müavini Elçin Əfəndiyevin qızıdır.
• Azərbaycanın görkəmli yazıçısı, Azərbaycan Respublikasının xalq yazıçısı İlyas Əfəndiyevin nəvəsidir.
• Sənətşünas alim, Əməkdar incəsənət xadimi, Əməkdar elm xadimi Timuçin Əfəndiyevin qardaşı qızıdır.
• Tanınmış hüquqşünas,Azərbaycan Respublikası Konstitusiya Məhkəməsinin hakimi Humay Əfəndiyevanın bacısıdır.

2004–2008-ci illərdə Azərbaycan Respublikasının İstanbul Baş konsolosluğunda vitse–konsul, konsul vəzifələrində çalışaraq başlamışdır. 2009–2015-ci illərdə Azərbaycan Respublikası Xarici İşlər Nazirliyinin UNESCO üzrə AR Milli Komissiyasının birinci katibi, müşaviri, baş katibi vəzifələrində çalışmışdır. 2015-ci ilin 11 sentyabr tarixində Türk Şurasının (Türk Dövlətləri Təşkilatı) Dövlət Başçılarının Astana zirvə görüşü zamanı qəbul etdikləri qərəra əsasən, Türk Mədəniyyəti və İrsi Fondunun ilk prezidenti təyin olunmuş, 2023-cü ilin noyabr ayına qədər bu vəzifədə çalışmışdır.

06 oktyabr 2015-ci ildə Azərbaycan Respublikası Prezidentinin müvafiq sərəncamı ilə ikinci dərəcəli fövqəladə və səlahiyyətli elçi diplomatik rütbəsi verilib.

Günay Əfəndiyeva 2024-cü il növbədənkənar parlament seçkilərində Bitərəf kimi 14 saylı Xəzər–Pirallahı seçki dairəsindən deputatlığa namizəd olmuşdur. Seçkidə qələbə qazanaraq Azərbaycan Respublikası Milli Məclisinin VII çağırış deputatı seçilib.

23 sentyabr 2024-cu ildə Milli Məclisin Mədəniyyət komitəsinin (sədr: Polad Bülbüloğlu) sədr müavini, Səhiyyə komitəsinin üzvüdür.

Türk Dövlətləri Parlament Assambleyasının üzvüdür.

Günay Əfəndiyeva Azərbaycan–Bolqarıstan, Azərbaycan–Braziliya, Azərbaycan–Çin, Azərbaycan–İtaliya, Azərbaycan–Macarıstan, Azərbaycan–Özbəkistan, Azərbaycan–Polşa, Azərbaycan–Rumıniya, Azərbaycan–Yaponiya parlamentlerarası əlaqələr üzrə işçi quruplarının üzvüdür

06.07.2009-cu il tarixində “Azərbaycan Respublikası diplomatik xidmət orqanlarının 90 illiyi (1919-2009)”, 09.07.2019-cu il tarixində “Azərbaycan Respublikası diplomatik xidmət orqanlarının 100 illiyi (1919-2019)” medalları ilə təltif olunmuşdur.

Qırğız Respublikasının Prezidentinin Fəxri Fərmanı (2023), Y.Balasagın adına Qırğız Milli Universitetinin Fəxri Professoru (2022), Nəzir Torekulov adına Qazaxıstanın Ali diplomatik medalı (2023), TÜRKSOY 30-cu il medalı (2023), Qırğız Respublikasının əməkdar mədəniyyət işçisi (2023), Manas medalı (2023), Çingiz Aytmatov medalı (2021), Abay Kunanbayev medalı (2020) və bir çox digər medal və fəxri adlarla təltif olunmuşdur.

2024-cü ilin oktyabrında Macarıstanın ali mükafatlarından biri olan “Xidmətlərə görə Komandor Xaçı” ordeni ilə təltif olunub.

2025-ci ildə Özbəkistan Respublikasının Mədəniyyət Nazirliyi tərəfindən “Özbəkistanın mədəniyyət elçisi” medalı ilə təltif olunub.