Əlbatti məscidi — 1878-ci ildə tikilmiş tarix-memarlıq abidəsi, məscid. Azərbaycanın Fatmayı kəndində yerləşir.

Əlbatti məscidi Fatmayı kəndində tikilib. Məscidin giriş qapısının üstündəki daş kitabədə onun hicri-qəməri təqvimi ilə 1295-ci (1878) ildə inşa edildiyi yazılıb. Şirvan-Abşeron memarlıq üslubunda tikilib. Planlaşdırma sisteminə görə T şəkilli məscidlər qrupuna aiddir. Məscidin qərb hissəsi pilləkan yolu ilə həll olub.

Sovet işğalından sonra Azərbaycanda 1928-ci ildə rəsmi olaraq dinlə mübarizəyə başladılar. Bir çox məscid, kilsə və sinaqoqlar maarifləndirici istiqamətlərdə istifadə üçün klubların balansına verildi. Əgər 1917-ci ildə Azərbaycanda 3.000 məscid var idisə 1927-ci ildə bu rəqəm 1.700, 1928-ci ildə 1369, 1933-cü ildə isə 17 idi. Əlbatti məscidi də bu dövrdə fəaliyyətini dayandırıb. 1970-ci ildə çəkilmiş "Yeddi oğul istərəm" filminin bəzi fraqmentləri məscidin həyətində çəkilib.

Azərbaycan müstəqilliyini yenidən bərpa etdikdən sonra məscid dindarların istifadəsinə verilib. 2 avqust 2001-ci ildə Azərbaycan Respublikası Nazirlər Kabinetinin verdiyi 132 nömrəli qərar ilə məscid, yerli əhəmiyyətli daşınmaz tarix və mədəniyyət abidələrinin siyahısına salınıb.